ஆசிரியர் எஸ்.கே. அஹமது – சில நினைவுகள்

இரங்கல் கட்டுரை: ஆசிரியர் எஸ்.கே. அஹமது – சில நினைவுகள்

2025 ஜூன் 20 அன்று, தமிழ்நாடு கலை இலக்கியப் பெருமன்றத்தின் தக்கலை கிளையின் முன்னோடியும், பகுத்தறிவு இயக்கத்தின் தீவிர செயற்பாட்டாளருமான ஆசிரியர் எஸ்.கே. அஹமது (முழுப்பெயர் எஸ்.குஞ்ஞி அஹமது) இயற்கை எய்தினார். மறுநாள், ஜூன் 21 காலை 10 மணியளவில், ஆயிரக்கணக்கான உறவினர்கள், நண்பர்கள், தோழர்கள் மத்தியில் அவரது உடல் நல்லடக்கம் செய்யப்பட்டது. அவரது மறைவு, தமிழ்ச் சமூகத்திற்கு ஈடு செய்ய முடியாத இழப்பாகும். பகுத்தறிவு, முற்போக்கு சிந்தனை, சமூகநீதி, பெண்ணுரிமை ஆகியவற்றிற்காக அர்ப்பணித்த அவரது வாழ்க்கை, ஒரு சமூகப் பயணியின் உருவகமாக விளங்குகிறது. வலதுசாரி, இந்துத்துவ, பாசிச அபாயங்களுக்கு எதிராக எழுப்பிய அவரது குரல், கலை இலக்கியப் பங்களிப்பு, பெண்ணடிமைத்தனத்திற்கு எதிரான உறுதி, மற்றும் நேர்மையான வாழ்க்கை ஆகியவை இந்தக் கட்டுரையில் பதிவு செய்யப்படுகின்றன.

எஸ்.கே. அஹமது, தனது தாய்வழி தாத்தாவின் பெயரை அடிப்படையாகக் கொண்டு பெயர் சூட்டப்பட்டவர். “குஞ்ஞி” என்றால் மலையாளத்தில் “சிறிய” எனப் பொருள். அவரது தாத்தா, இஸ்லாமிய மார்க்க அறிஞரும், குளச்சல் ஜமாஅத் பெரிய பள்ளிவாசலின் தலைமை இமாமுமாக இருந்தவர். அவரது தாயார் றொஹையா பீவி, தாத்தாவின் மூத்த மகள். தாய்க்கு ஒரே சகோதரரான மற்றொரு மார்க்க அறிஞரும், குளச்சல் பள்ளிவாசலின் இமாமுமாக இருந்தார்.

எஸ்.கே. அஹமதுவின் மூத்த சகோதரி பாத்திமா பீவி, தக்கலையைச் சேர்ந்த வசதியான நில உடைமையாளரும், ஜவுளிக்கடை உரிமையாளருமான ஏ. முகம்மது அப்துல் ரஹ்மானை மணந்தார். அவரது அத்தான், கம்யூனிஸ்ட் கட்சியின் ஆதரவாளராகவும், பத்மனாபபுரம் நகராட்சி உறுப்பினராக மூன்று முறை தேர்ந்தெடுக்கப்பட்டவராகவும் இருந்தார். அவரது அத்தான் நெருங்கிய தோழரான மாவட்டச் செயலாளர் எம்.எம். அலியுடன் இணைந்து,  கட்சியின் நிதித் தேவைகளைப் பூர்த்தி செய்தார். தக்கலை மேட்டுக்கடை, கம்யூனிஸ்ட் கட்சியின் ஆதரவுத் தளமாக இருந்தது. எஸ்.கே. அஹமதுவும், அவரது மூத்த சகோதரர் அப்துல் காதரும், சகோதரியுடன் தக்கலைக்கு இடம்பெயர்ந்தனர். அப்துல் காதர், அவரது அத்தானின் தொழில்களுக்கு உறுதுணையாக இருந்தார், ஆனால் எஸ்.கே. அஹமது ஆசிரியர் பயிற்சி முடித்து அரசுப் பள்ளி ஆசிரியராகப் பணியில் சேர்ந்தார்.

எஸ்.கே. அஹமது மற்றும் அவரது மூத்த சகோதரர் ஆரம்பத்தில் ஒரே கம்யூனிஸ்ட் கட்சியில் உறுப்பினர்களாக இருந்தனர். 1964இல் கட்சி பிளவடைந்த பின்னர், அவர்கள் மார்க்சிஸ்ட் கட்சியில் தொடர்ந்தனர். ஆசிரியர் பணியில் சேர்ந்த பிறகு, எஸ்.கே. அஹமது கட்சி உறுப்பினர் பொறுப்பை விட்டுவிட்டாலும், மார்க்சிஸ்ட் ஆதரவாளராகவும், பின்னர் பெரியாரின் பகுத்தறிவுக் கொள்கைகளால் ஈர்க்கப்பட்டு பகுத்தறிவுவாதியாகவும் மாறினார். அவரது தம்பி, மார்க்சிஸ்ட் கம்யூனிஸ்ட் கட்சியின் முன்னாள் எம்.எல்.ஏ.வான எஸ். நூர்முகமது, மிசா சிறையில் இருந்தபோது, எஸ்.கே. அஹமது அவரை அடிக்கடி சந்தித்து ஆதரவு தெரிவித்தார். தம்பியின் அரசியல் வாழ்க்கையை அவர் பெருமையுடன் ஆதரித்தார்.

வலதுசாரி, இந்துத்துவ, பாசிச சக்திகளுக்கு எதிராக எஸ். அஹமது தொடர்ந்து குரல் கொடுத்தவர். இந்துத்துவத்தின் பிற்போக்கு சிந்தனைகளையும், சமூகப் பிளவுகளைய பரப்புவதையும் அவர் தனது சொற்பொழிவுகளில் எதிர்க்கொண்டார். பகுத்தறிவு இயக்கத்தின் மூலம், இந்த அபயங்களை மக்களுக்கு எளிய மொழியில் விளக்கி, விழிப்புணர்வு ஏற்படுத்தினார். தந்தை பெரியாரின் கொள்கைகளை அடிப்படையாகக் கொண்டு, அவர் தர்க்கமான வாதங்களை முன்வைத்து, மதவாதத்தையும் சாதிய அடக்குமுறைகளையாகு எதிர்த்தார். இந்தப் பங்களிப்பு, தமிழ்நாட்டில் முற்போக்கு இயக்கங்களுக்கு உந்துதல் அளித்தது.

எஸ. கே. அஹமது, தமிழ்நாடு கலை இலக்கியப் பெருமன்றத்தின் தக்கலை கிளையை 1980களில் வளர்த்தெடுத்தவர். இலக்கிய விவாதங்கள், கலை நிகழ்ச்சிகள், கருத்தரங்குகள் மூலம் பகுத்தறிவு மற்றும் முற்போக்கு சிந்தனைகளைப் பரப்பினார். இலக்கியம், மக்களை விழிப்படையச் செய்யும் ஆயுதமாக அவர் நம்பினார். இதற்காக, பல இலக்கிய நிகழ்ச்சிகளை ஒருங்கிணைத்து, இளைய தலைமுறையினரை இலக்கிய ஆர்வலர்களாக மாற்றினார். இவை, தக்கலையை ஒரு இலக்கிய மையமாக்கியது.

பெண்ணடிமைத்தனத்துக்கு எதிரான எஸ்.கே. அஹமுதுவின் போராட்டம், அவரது முக்கிய பங்களிப்புகளில் ஒன்று. பெண்களுக்கு சம உரிமை மற்றும் சமூகத்தில் சமமான இடம் பெற வேண்டும் என்பதற்காக, பெரியாரின் கொள்கைகளை முன்னிறுத்தி அவர் பேசினார். பெண்களுக்கு எதிரான பாகுபாடுகளை வெளிப்படையாக விமர்சித்து, அவர்களுக்கு மரியாதையும் உரிமைகளும் வலியுறுத்தினார். இந்தப் பணி, அவரை ஒரு முன்மாதிரி சமூகச் செயற்பாட்டாளராக உயர்த்தியது.

எஸ்.கே.  அஹமுது ஒரு மிகச் சிறந்த ஆசிரியராக, மாணவர்களுக்கு பகுத்தறிவு, சமூகநீதி, மற்றும் முற்போக்கு சிந்தனைகளை விதைத்தார். தமிழ்நாடு அரசின் “நல்லாசிரியர் விருது” பெற்ற அவரது கல்விப் பணி, மாணவர்களின் வாழ்க்கையில் ஆழமான தாக்கத்தை ஏற்படுத்தியது. நேர்மையையும் கொள்கை உறுதியையும் ஒருபோதும் விட்டுக் கொடுக்காத அவர், ஒரு வாழ்க்கையாக ஒரு உதாரணமாக விளங்கினார்.

எஸ்எஸ்.கே. அஹமதுவுக்கு வாழ்க்கையில் பல சவால்கள் இருந்தபோதிலும், காலம் கடந்து திருமணமாகி, லெனின் மற்றும் ஸ்டாலின் எனப் பெயரிடப்பட்ட இரண்டு மகன்கள் பிறந்தனர். பின்னர், அவர்கள் மதப்பற்று கொண்டு ஜலீல், சியாது என பெயர் மாற்றிக்கொண்டனர். இருப்பினும், எஸ்.கே. அஹமது இறுதி காலம் வரை இடதுசாரி மற்றும் பெரியாரியக் கொள்கைகளில் உறுதியாக இருந்தார். கண்டிப்பான ஆசிரியராகவும், கோபக்காரராகவும் இருந்தபோதும், குடும்ப உறுப்பினர்களிடம் பாசமிக்கவராகவிருந்தார். அவரது தம்பியுடன் 12 வயது வித்தியாசம் இருந்தபோதும், அவரை ஒரு மூத்த குடும்ப உறுப்பினராக மதித்து நடந்து கொண்டார்.

வயது மூப்பு மற்றும் கால் பலவீனம் காரணமாக, எஸ்.கே. அஹமுதுவின் இறுதி இரண்டு ஆண்டுகள் வீட்டோடு முடங்கியிருந்தன. ஆனாலும், அவரது வாசிப்பு ஆர்வம் தொடர்ந்து. கடந்த இரண்டு மாதங்களாக படுத்த படுக்கையாக இருந்த அவரை, மருமகள்கள் தந்தையைப் போல பராமரித்தனர். 2025 ஜூன் 20 மதியம் 12:10 மணியளவில், தக்கலையில் உள்ள அவரது இல்லத்தில் உயிர் பிரிந்தது. விடுதலை பத்திரிகை தனி செய்தியுடன் அவருக்கு மரியாதை செலுத்தியது.

ஆரியர் எஸ்எஸ்.கே. அஹமுதுவின் மறைவு, ஒரு முற்போக்கு சிந்தனையாளர், இலக்கிய ஆர்வலர், பெண்ணுரிமைப் போராளி, மற்றும் நேர்மையின் உருவத்தை இழந்த இழப்பாகும். அவரது குரல், கலை இலக்கியப் பங்களிப்பு, பெண்ணு உரிமைக்கான உறுதி, மற்றும் நேர்மையான வாழ்க்கை வரும்கால தலைமுறைகளுக்கு வழிகாட்டியாக இருக்கும். ஆசிரியர் எஸ்.கே. அஹமது அவர்களுக்கு ஆழ்ந்த இரங்கலைத் தெரிவிக்கிறோம்.